काठमाडौं —केही सामाजिक सञ्जालमा “राष्ट्रिय आविष्कार केन्द्रमा बनेको” भन्दै एक मान्छे बोक्ने ड्रोनको भिडियो व्यापक रूपमा प्रचार प्रसार भइरहेको छ। तर, उक्त दावी भ्रामक भएको भन्दै राष्ट्रिय आविष्कार केन्द्रले आधिकारिक स्पष्टीकरण दिएको छ।

केन्द्रले जारी गरेको जानकारी अनुसार, सो भिडियोमा देखिएको मान्छे बोकेर उडेको ड्रोन राष्ट्रिय आविष्कार केन्द्रको होइन। केन्द्रले हाल ४५ किलोग्रामसम्म तौल बोक्न सक्ने ड्रोन निर्माण गरी परीक्षण गरिरहेको छ, जसको तस्बिर समेत सार्वजनिक गरिएको छ।

“केही सामाजिक सञ्जालमार्फत भ्रम फैलाइएको छ कि उक्त उडिरहेको मान्छे बोक्ने ड्रोन हाम्रो हो। यो पूर्ण रूपमा गलत हो,” केन्द्रको विज्ञप्तिमा उल्लेख गरिएको छ।

आविष्कार केन्द्रका अनुसार हाल निर्माण भइरहेको ड्रोन आपतकालीन उद्धार, कृषि तथा सामाग्री ढुवानीका लागि उपयोगी हुने खालको हो।

प्रविधि क्षेत्रमा केन्द्रको निरन्तर अनुसन्धान र परीक्षण कार्यप्रति सामाजिक सञ्जाल प्रयोगकर्ताहरूले चासो देखाउँदै आए पनि यस्ता भ्रामक प्रचारले जनतामा गलत सन्देश जाने सम्भावना हुने भएकाले यस्ता सूचनामा पुष्टि नभएसम्म विश्वास नगर्न आग्रह गरिएको छ।