लुम्बिनी विकास कोषका उपाध्यक्ष अवधेशकुमार त्रिपाठी (भिक्षु मैत्तेय)को कार्यकाल सोमबारदेखि सकिएसँगै सो पदका लागि आकांक्षीहरुको दौडधुप बढ्न थालेको छ ।

कोषको उपाध्यक्षमा त्रिपाठी २०७५ सालमा नियुक्त भएका थिए । उनको पाँच वर्षे कार्यकाल सकिएसँगै नयाँ उपाध्यक्षका लागि दौडधुप सुरु भएको हो । उपाध्यक्ष बन्न स्थानीय भिक्षुदेखि पूर्व पदाधिकारीसम्मको नाम चर्चामा छ ।

कोषको अध्यक्ष संस्कृति, पर्यटन तथा नागरिक उड्डयन मन्त्री रहने व्यवस्था छ । अहिले पूर्व सांसद ल्यारक्याल लामा, गायिका आनी छोइङ डोल्मा, निवर्तमान उपाध्यक्ष अवधेशकुमार त्रिपाठी (भिक्षु मैत्तेय), पूर्व उपाध्यक्ष सिद्धार्थ महर्जन (भिक्षु निग्रोध), पूर्व सदस्य भिक्षु कुन्डय र स्थानीय सुमार्ग भिक्षुको नाम उपाध्यक्षका लागि चर्चामा छ ।

सोमबार कार्यकाल सकिएका उपाध्यक्ष त्रिपाठीलाई अझैसम्म औपचारिक कार्यक्रम गरेर बिदाइ गरिएको छैन । 

लुम्बिनी विकास कोषमा संघीय सरकारले प्रदान गर्ने बजेट घटे पनि विकास कोष आफैँले भने आन्तरिक बजेट वृद्धि गरेको छ ।

संघीय सरकारले गत वर्ष १ अर्ब १० करोड रुपैयाँ विनियोजन गरेको थियो तर अहिले जम्मा ४५ करोडमात्रै छुट्याइएको छ । 

लुम्बिनी विकास कोषले चालु आर्थिक वर्षका लागि ६७ करोड ३ लाखको बजेट सार्वजनिक गरेको छ । जस अनुसार लुम्बिनी गुरुयोजना कार्यान्वयनका लागि संघीय सरकारबाट प्राप्त अनुदान ४५ करोड रहेको छ । आन्तरिक तर्फ २३ करोड ३ लाख रुपैयाँ विनियोजन भएको हो । आर्थिक वर्ष २०७९÷८० मा आन्तरिक तर्फ १७ करोड ४० लाख विनियोजन भएको थियो ।

 उनले अहिले विकास कोषले लिने शुल्क, भूशुल्क आदिको आधारमा गत वर्षभन्दा आन्तरिक बजेट वृद्धि भएको बताए ।