(सिमरा) बाराको जीतपुरसिमरा उपमहानगरपालिका भित्रका थप १७ जनामा कोरोना संक्रमण पुष्टि भएको छ । 

उपमहानगरपालिकाले संचालन गरेको क्वारेन्टाइनमा परीक्षणका लागि स्वाब दिएकामध्ये १७ जनामा कोरोना देखिएको हो । कोरोना पुष्टि हुनेमा उपमहानगरका कर्मचारी, पत्रकार र स्थानीय समेत छन् । क्वारेन्टाइनमा स्वाब संकलन गरिएको एक सय ५० मध्ये १७ जनाको कोरोना रिपोर्ट पोजिटिभ आएको हो ।

जीतपुर स्वास्थ्य चौकीका कर्मचारीमा कोरोना देखिएपछि उपमहानगरपालिकाले केही दिनअघि आफ्ना कर्मचारी र स्थानीयको स्वाब संकलन गरेर परीक्षणका लागि वीरगन्ज पठाएको थियो । परीक्षणका लागि पठाएकामध्ये स्वास्थ्यसहित अन्य शाखाका कर्मचारी, एक पत्रकार र स्थानीयमा कोरोना पुष्टि भएको हो । 

यसअघि मंगलबार उपमहानगरपालिकाको एक स्वास्थ्य कर्मचारी, दुई सशस्त्र प्रहरीसहित चार जनामा कोरोना देखिएको थियो । समुदायस्तरमा कोरोना संक्रमण देखिन थालेपछि उपमहानगरपालिकाले परीक्षणको दायरा बढाउदै लगेको छ ।