(काठमाडौं) नेपाली सेनाको कुटाइपछि मृत्यु भएका चितवनका राजकुमार चेपाङको शव पोस्टमार्टम गर्न काठमाडौं ल्याइएको छ । घटना विवादित रहेको भन्दै भरतपुर अस्पतालले पोस्टमार्टम गर्न नमानेपछि शव काठमाडौं महाराजगञ्जस्थित शिक्षण अस्पताल ल्याइएको हो ।

बिहीबार बिहान भरतपुर अस्पतालमा २४ वर्षीय राजकुमार चेपाङको मृत्यु भएको थियो । उनको मृत्युको कुनैपनि कारण नभई सेनाको कुटाई नै भएको परिवारको दावी गर्दै पोस्टमार्टम गर्न परीवार सदस्य मानेका थिएनन् । यद्यपि नेपाली सेनाले त्यसकाे खण्डन गर्दै  आएकाे छ । आइतबार (हिजो) जिल्ला प्रशासन कार्यालय चितवनमा दुई पक्षबीच भएको वार्तापछि परिवारका सदस्यहरु पोस्टमार्टम गर्न सहमत भएपछि शव काठमाडौं ल्याइएकाे हाे ।  शव प्रहरीले चेपाङ समुदायका चार अगुवालाइ पनि काठमाडाैं ल्याएकाे छ ।

आइतबार भएको दुई पक्षिय छलफलमा चेपाङको परिवार बस्दै आएको घर चितवन राष्ट्रिय निकुञ्जले बनाइदिने, राजकुमारकी डेढ बर्षीया छोरीका लागि मासिक एक हजार रुपैयाँ जम्मा गरिदिने र मृतककी श्रीमतीलाई क्षमताअनुसारको राजगारी दिने सहमति भएको थियो ।

बिहीबारबाटै भरतपुर अस्पतालको शव गृहमा राखिएको थियो । ब्लक फ्याक्ट्रीमा काम गर्ने राजकुमारलाई राप्ती नदी वररुपरी घोँगी र न्यूरो टिप्न जाँदा साउन १ गते चितवन राष्ट्रिय निकुञ्जको सुरक्षाका लागि खटिएका नेपाली सेनाले कुटपीट गरेका थिए ।

त्यसपछि घर आएका राजकुमार विरामी परेका थिए । तर बिहीबार बिहान भरतपुर अस्पतालमा राजकुमार चेपाङको मृत्यु भएको थियो । मेडिकलको औषधि दिइएपनि उनको अवस्था सुधार नभएपछि उनलाई उपचारका लागि भरतपुर ल्याइएको थियो ।  सेनाको कुटाइबाट राजकुमारको मृत्यु भएको भन्ने समाचार आएपछि नेपाली सेनाले एक बिज्ञप्ति जारी गर्दै घटनाको छानविनमा पूरा सहयोग गर्नै बताएको थियो ।