अविरल वर्षापछि आएको पहिरोका कारण अवरूद्ध बनेको राष्ट्रिय गौरवको आयोजना मध्यपहाडी (पुष्पलाल) राजमार्गको बागलुङ खण्ड सञ्चालनमा आएको छ।

पहिरोका कारण मंगलबारदेखि अवरूद्ध मध्यपहाडी लोकमार्गको बागलुङ खण्ड बिहीबार साँझदेखि एकतर्फी सञ्चालनमा आएको हो। बागलुङ नगरपालिका–३ बोक्सेमा गएको ठूलो पहिरोका कारण अवरूद्ध बनेको लोकमार्ग आयोजना कार्यालयको सक्रियतामा तीन दिनपछि खुलाइएको मध्यपहाडी पुष्पलाल लोकमार्ग कार्यालय पर्वतका प्रमुख आशिष थापाले बताए।

‘एकतर्फी यातयात सञ्चालनमा आएको छ’, थापाले भने, ‘ठूलो पहिरो भएकाले पानी पर्नासाथ पुनः लोकमार्ग अवरूद्ध हुनसक्ने अवस्था छ।’

पहिरोले सडक अवरूद्ध हुँदा तीन दिनदेखि सवारी साधनबीच बाटोमै अलपत्र परेका थिए। बुधबारदेखि नै पहिरो हटाउन प्रयास भए पनि ठूलो पहिरो भएका कारण समस्या भएको लोकमार्ग खुलाउन खटिएका जिल्ला प्रहरी कार्यालयका प्रहरी निरीक्षक दीपक रिजालले जानकारी दिए।

उनले जतिबेला पनि पुनः पहिरो खस्ने भएकाले रातको समयमा सवारी साधन सञ्चालन गर्न रोक लगाउनुपर्ने बताए।