(पाल्पा) सोमबार रातिदेखि परेको अविरल वर्षाका कारण पाल्पा बुटवल सडक खण्डको सिद्धबाबा क्षेत्रमा अहिलेसम्मकै ठूलो पहिरो गएको छ । सिद्धबाबा मन्दिर नजिकै ड्यामसाइड नजिक अहिलेसम्मकै ठूलो पहिरो गएका कारण बाटो पूर्णरुपमा अवरुद्ध भएको जिल्ला प्रहरी कार्यालय पाल्पाले जनाएको छ ।

प्रहरीले ठूलो पहिरो झरेको र निरन्तर पानी परेको कारण यस क्षेत्रमा पैदल तथा यातायातका साधन प्रवेशमा निषेध गरेको पाल्पा जिल्ला प्रहरी कार्यालय पाल्पाका डीएसपी मदन गिरीले बताउनुभयो । उहाँले प्रहरीले सूचना नै जारी गरेर पैदल यात्रा समेत नगर्न र बाटो पूर्ण रुपमा खुलेपछि मात्र यात्रा गर्न अनुरोध गरिएको जानकारी गराउनु भयो ।

निरन्तर परेको पानी र चुरे क्षेत्र भएको कारणले समेत पाल्पाको गौडेपुल देखि चिडियाखोला सम्मका क्षेत्रका विभिन्न क्षेत्रमा पहिरोहरु झरेका छन् । यात्रुहरुले बुटवल तानसेन यात्रा गर्दा बैकल्पिक मार्ग प्रयोग गर्न र अत्यावश्यक बाहेक नहिड्न समेत प्रहरीले अनुरोध समेत गरेको छ ।