(काठमाडौं) विद्युत नियमन आयोगले चार्जिङ स्टेसन सञ्चालकले अधिकतम् २० प्रतिशतसम्म मुनाफा लिन पाउने गरी यातायातका विद्युतीय सवारी साधन चार्ज गर्ने महसुल दर तोकेको छ । विद्युत नियमन आयोगले स्वाप सुविधा लिने ग्राहकसँग सिजनल (मौसमी) रुपमा र विहान, दिउँसो र बेलुका मूल्य फरक लिनुपर्ने गरी महसुल तोकेको हो ।

सवारी चार्ज गर्दा समयअनुसार प्रतियुनिट ४.४५ रुपैयाँदेखि ११.७० रुपैयाँसम्म तिर्नुपर्नेछ । वर्षायामको ८ महिना (वैशाखदेखि मंसिरसम्म) रातको समयममा चार्ज गर्न सबैभन्दा सस्तो पर्ने छ भने हिउँद (पुसदेखि चैतसम्म)को पिक समयमा सवारी चार्ज गर्दा सबैभन्दा महंगो मूल्य तिर्नुपर्नेछ ।

हिउँदमा उत्पादन घट्ने भएकाले महंगो मूल्यमा विजुली किन्नुपर्ने भएकाले महसुल पनि बढी तोकिएको हो । सार्वजनिक यातायातको चार्जिङ स्टेसनलाई रात (राती ११ देखि विहान ५ बजेसम्म) मा चार्ज गर्दा कम शुल्क तोकिएको छ । सरकारले चार्जिङ स्टेसनले विद्युतको डिमान्ड शुल्क तिर्ने वा वा स्वाप सुविधा दिएर नतिर्ने दुवै विकल्प खुला राखेर महसुल तोकेको छ ।

यसअनुसार डिमान्ड शुल्क तिर्ने स्टेसनहरुको प्रतियुनिट इनर्जी चार्ज सस्तो तोकिएको छ भने डिमान्ड शुल्क नतिर्ने चार्जिङ स्टेसनले प्रतियुनिटमा इनर्जी चार्ज केही महंगो तिर्नुपर्ने छ । तोकिएको समयअनुसार चार्ज गर्न आएकासँग महसुलमा २० प्रतिशत बढी मात्रै शुल्क जोडेर स्टेसनले ग्राहकलाई चार्जिङ सुविधा दिन सक्नेछन् ।

टाइम अफ दि डे (टीओडी) विद्युत महसुल दर (अटोमेटिक स्वाप कार्ड ग्राहक) डिमान्ड शुल्क नलाग्ने स्टेसनका लागि तोकेरै प्रतियुनिट कुल महसुल निर्धारण गरेको छ ।

डिमान्ड चार्ज तिर्ने चार्जिङ स्टेशनले २३० रुपैयाँ प्रतिकेभीए/प्रतिमहिना तिरेपछि साँझ ५ बजेदेखि राती ११ बजेसम्म प्रतियुनिट ७.१५ रुपैयाँ र ११ बजेदेखि भोलिपल्ट साँझ ५ बजेसम्म प्रतियुनिट ५.६० रुपैयाँ महसुल तिर्नुपर्छ । अन्य यातायाततर्फ २५० रुपैयाँ प्रतिकेभीए/प्रतिमहिना डिमान्ड चार्ज तिर्दा साँझ ५ बजेदेखि राती ११ बजेसम्म प्रति युनिट ९.६५ रुपैयाँ र राती ११ बजेदेखि भोलिपल्ट साँझ ५ बजेसम्म प्रतियुनिट ८.५० रुपैयाँ महसुल निर्धारण भएको छ ।

 वर्षायाम र रातमा सस्तो

डिमान्ड शुल्क नतिर्ने अटोमेटिक स्वाप कार्ड उपयोगकर्ता ग्राहकको लागि भने मौसमी मूल्य तोकिएको छ । वषर्ाको समय -वैशाखदेखि मंसिरसम्म) विद्युतीय सवारी चार्ज गर्न सस्तो पर्ने छ । सार्वजनिक सवारीको चार्जिङलाई प्रतियुनिट न्युनतम् ४.४५ रुपैयाँदेखि ८.७० रुपैयाँसम्म चार्जिङ स्टेसनले खर्चिनुपर्ने देखिन्छ ।

यो समय सार्वजनिक यातायातका चार्जिङ स्टेसन (३३ केभी लाइन लिएका)ले रातमा (राती ११ देखि विहान ५ बजेसम्म) प्रतियुनिट ४.४५ रुपैयाँ महसुल तिर्नुपर्ने छ । यस्तो महसुल ११ केभीका चार्जिङ स्टेशनलाई ५.०५ रुपैयाँ र तल्लो भोल्टेज (२३०/४००भोल्ट) का ग्राहकलाई ५.०५ रुपैयाँ पर्छ ।

यस्तै वषर्ाको मौसममा विहान ५ बजेदेखि साँझ ५ बजेसम्म ३३ केभीका चार्जिङ स्टेनसनले प्रतियुनिट ६.६० रुपैयाँ, ११ केभीकाले ६.७० र तल्लो भोल्टेजकाले ६.९० रुपैयाँ महसुल तोकिएको छ । यसैगरी पिक समय -साँझ ५ देखि राती ११ बजेसम्म) ३३ केभीको चार्जिङ स्टेशनलाई प्रतियुनिट ८.४० रुपैयाँ, ११ केभीकालाई ८.६० रुपैयाँ र तल्लो भोल्टेजकालाई ८.७० रुपैयाँ तोकिएको छ ।

चार्जिङ स्टेसनलाई पनि पुसदेखि चैतसम्म भने महसुल केही महंगो पर्छ । यो समयमा दिनलाई दुई भागमा विभाजन गरेर चार्जिङ स्टेसनको महसुल तोकिएको । ३३ केभीका चार्जिङ स्टेसनले साँझ ५ बजेदेखि राती ११ बजेसम्म प्रतियुनिट ८.४० रुपैयाँ महसुल छ भने ११ केभीकोलाई ८.६० रुपैयाँ र त्यसभन्दा तल्लो भोल्टेजकालाई ८.७० रुपैयाँ ।

हिउँदमा राती ११ बजेदेखि विहान ५ बजेसम्म ३३ केभीका चार्जिङ स्टेसनलाई प्रतियुनिट ६.६० रुपैयाँ, ११ केभीको स्टेसनलाई ६.७० रुपैयाँ, त्यसभन्दा तल्लो भोल्टेजका स्टेसनलाई ६.९० रुपैयाँ तोकिएको छ ।

सार्वजनिक बाहेकलाई कति ?

महसुलअनुसार सार्वजनिक यातायात बाहेकले चार्ज गर्ने चार्जिङ स्टेसनले न्युनतम् ४.४५ रुपैयाँदेखि ११.७० रुपैयाँसम्म महसुल तिर्नुपर्नेछ । यसअनुसार निजी सवारीका चार्जिङ सार्वजनिकभन्दा केही महंगो पर्ने छ ।

यस्ता चार्जिङ स्टेसनले वैशाखदेखि मंसिरसम्म पिक समय (साँझ ५देखि राती ११ बजेसम्म)मा चार्जिङ स्टेसनको प्रकारअनुसार प्रतियुनिट ११.२० रुपैयाँदेखि ११.७० रुपैयाँसम्म महसुल तिर्नुपर्ने हुन्छ । वर्षाको यो सिजनमा रातमा भने प्रतियुनिट ४.४५ रुपैयाँदेखि ५.१५ रुपैयाँसम्म महसुल तिर्नुपर्नेछ । यस्तै वर्षाको समयका दिन (विहान ५देखि साँझ ५ बजेसम्म)मा प्रतियुनिट १०.१० देखि १०.३० रुपैयाँ महसुल तोकिएको छ ।

यी महसुलहरुमा २० प्रतिशत शुल्क जोडेर चार्जिङ स्टेसनले ग्राहकबाट शुल्क लिन पाउँछन् ।