(भक्तपुर) भक्तपुर क्यान्सर अस्पतालमा उपचारका लागि आएकी १२ वर्षीया बालिकामा शनिबार राति कोरोना संक्रमण पुष्टि भएपछि अस्पतालकोे एनएक्स वार्ड सिल गरिएको छ । सो वार्ड आज बिहानबाट सिल गरिएको अस्पताल प्रशासनले जनाएको छ ।

काभ्रे जिल्लाका संक्रमित बालिकालाई काठमाडौंको बीर अस्पतालबाट ब्रेन सम्बन्धी रोगको अपरेशन गर्न भक्तपुर क्यान्सर अस्पतालमा रेफर गरिएको थियो । बालिकाको अपरेशन पूर्व गरिएको पीसीआर परीक्षणको रिपोर्ट पोजिटिभ आएको स्वास्थ्य कार्यालय भक्तपुरका प्रमुख कृष्णबहादुर मिजारले बताउनु भयो । उनलाई थप उपचारको लागि शनिवार राति नै त्रिवि बिक्षण अस्पताल महाराजगञ्ज लगिएको प्रमुख मिजारले बताउनु भयो ।

बालिकाको अपचारमा संलग्न अस्पतालका ५ जना डाक्टर, १२ जना नर्सलाई अस्पतालमै क्वारेन्टाइनमा राखिएको छ भने एनएक्स वार्डमा रहेका १३ जना बिरामी र १३ जना कुरुवा सबैलाई अस्पताल मै क्वारेन्टाइनमा राखिएको प्रशासन प्रमुख राजाराम तजलेले जानकारी दिनुभयो ।

अस्पतालको क्वारेन्टाइनमा रहेका सबैको कोराना संक्रमण परीक्षणका लागि स्वाब संकलन गरिसकेको समेत तजलेले जानकारी दिनु भयो । अस्पतालका अन्य सेवा र सुविधाहरु भने सबै सञ्चालनमा रहेको पनि तजेलले बताउनुभयो ।