(काठमाडौं) विश्वभर कोराना भाइरस (कोभिड-१९) बाट संक्रमित हुनेको संख्या ४० लाख नाघेको छ । जोन्स हप्किन्स युनिभर्सिटीको तथ्यांक अनुसार अहिलेसम्म विश्वभर ४० लाख २४ हजार ७३७ संक्रमित फेला परेका छन् । त्यस्तै मृत्यु हुनेको संख्या पनि दुई लाख ७९ तीन सय १३ पुगेको छ ।

विश्वभर १३ लाख ७५ हजार ८५४ संक्रमित निको भएर घर फर्किसकेका छन् । कोरोना भाइरसबाट सबैभन्दा प्रभावित मुलुक अमेरिकामा अहिलेसम्म १३ लाखभन्दा धेरै संक्रमित फेला परेका छन् भने ७८ हजारभन्दा धेरैको मृत्यु भइसकेको छ । स्पेनमा दुई लाख २३ हजारभन्दा धेरैमा कोरोना भाइरसको संक्रमण देखिँदा २६ हजारभन्दा बढीको मृत्यु भइसकेको छ । इटालीमा दुई लाख १८ हजारभन्दा धेरै संक्रमित भेटिँदा ३० हजारभन्दा बढीको मृत्यु भएको छ ।

बेलायतमा पनि दुई लाख १६ हजारभन्दा बढी संक्रमित भेटिँदा ३१ हजारभन्दा धेरैको मृत्यु भइसकेको छ ।

अहिलेसम्म अमेरिकामा दुई लाख १२ हजार संक्रमित निको भएर घर फर्किएका छन् । त्यस्तै जर्मनीमा एक लाख ४३ हजार, स्पेनमा एक लाख ३३ हजार र इटालीमा एक लाख तीन हजारभन्दा धेरै संक्रमित निको भएर घर फर्किसकेका छन् ।