कैलालीको लम्की चुहा नगरपालिका-१ मा एक महिलालाई कोरोनाभाइरस (कोभिड-१९) को संक्रमण पुष्टि भएको छ।

स्वास्थ्य मन्त्रालय स्रोतले महिलामा संक्रमण पुष्टि भएको सेतोपाटीलाई जानकारी दिए।

'उहाँको संक्रमण पुष्टि भइसकेको छ,' स्रोतले भन्यो।  १५ दिनअघि वीरगञ्जबाट आएकी ती महिलालाई लम्की बहुमुखी क्याम्पसको क्वारेन्टिनमा राखिएको थियो।

र्‍यापिड टेस्टका क्रममा उनको नतिजा नेगेटिभ आएको थियो। तर थप परीक्षणका लागि उनको स्वाब काठमाडौं पठाइएको थियो। काठमाडौंमा परीक्षण गर्दा उनको नतिजा पोजेटिभ देखिएको हो। अहिले महिलालाई सेती प्रादेशिक अस्पतालको आइसोलेसनमा राखिएको छ।

संक्रमित महिलासँगै १७ जनाको टोली वीरगञ्जबाट गत चैत १७ गते लम्की पुगेका थिए। बाँकीको पनि नमूना परीक्षणको गरिएको सबैको नतिजा नेगेटिभ आएको छ।

'उहाँहरूलाई पर्सा जिल्ला प्रशासन कार्यालयले पत्रसहित चिसापानीसम्म छोडिदिनुभएछ। त्यहाँबाट उहाँहरू सिधै आ-आफ्नो घर जानुभएछ' लम्कीचुहा-१ का वडा अध्यक्ष जनक बमले भने, 'गाउँलेले बाहिरबाट आएको खबर गरेपछि सबैलाई क्वारेन्टिनमा राख्यौं।'

यसअघि आइतबार वीरगञ्जको मस्जिदमा बसेका तीन जना भारतीयमा कोरोनाको संक्रमण पुष्टि भएको थियो। धनगढीस्थित सेती प्रादेशिक अस्पतालमा अहिले चार जना कोरोना संक्रमितको उपचार भइरहेको छ।

योसँगै नेपालमा कोरोना संक्रमितको संख्या १३ पुगेको छ। एक जनाको उपचारपछि घर फर्किएका छन भने बाँकीको विभिन्न अस्पतालमा  उपचार भइरहेको छ।