काठमाण्डौ : लुइँटेलभञ्ज्याङ भच्चेक सडक(द्रव्यशाह राजमार्ग) मा कालोपत्रे गर्ने काम सम्पन्न भएको एक महिना नबित्दै भत्केकोप्रति प्रदेश सांसद मनकुमारी गुरुङले गण्डकी प्रदेश सरकारको ध्यानाकर्षण गराएकी छन् । सोमबार संसदको विशेष समयमा बोल्दै गुरुङले सो सडकको कालोपत्रेको गुणस्तरप्रति प्रश्नचिन्ह खडा गरिन् ।

‘गोरखाको दक्षिणी भेग र उत्तरी भेग जोड्ने अर्थात गोरखाको क्षेत्र नं. २ को मेरुदण्डको रुपमा रहेको द्रव्यशाह राजमार्ग कालोपत्रे हुदैछ, भत्किैछ’, उनले भनिन्, ‘पिच भएको एक महिना बितेको छैन, मध्यबर्खाको बेला सो सडकको चिउरीबोट तारकेडाँडा खण्डमा भत्किएका कारण २०, २५ दिनसम्म गाडी चल्न सकेन । पहिरो सम्भावित ठाउँहरुमा वाल नलगाई पिच गरेको छ । यसको गुणस्तरको बारेमा अनुसन्धान हुनुपर्छ ।’ ठेकेदारको लापार्बाहीका कारण सडक दीगो हुन नसकेको भन्दै उनले सरकारले यसप्रति कडाइका साथ छानबीन गर्नुपर्ने औल्याइन् ।

ठेकेदारको लापार्बाहीकै कारण बारपाक सडक बर्षौंदेखि अलपत्र रहेको उनको आरोप छ । ‘ठेकेदारको लापार्बाहीका कारण बारकिलो भालुस्वाँरा बारपाक सडक बर्षौं भइसक्यो, अलपत्र छ । त्यसलाई छिटोभन्दा छिटो निर्माण सम्पन्न गर्न म सरकारको ध्यानाकर्षण गराउँछु’, उनले भनिन्, ‘दूधपोखरी सडकको गाँडखोरिया भन्नै ठाउँमा पहिरो जाँदा लामो समयदेखि त्यहाँको अबस्था अस्तब्यस्त भएको छ । यसप्रति पनि सरकारको चाँडो ध्यान जाओस् भन्ने आग्रह गर्छु ।’ केही दिनअघिको बाढीले भुसुण्डेफाँट, दरौंदी फाँट, ज्यादीखोला फाँट, लुदीखोला फाँटमा लगाइएको धानबाली तहसनहस भएकोप्रति पनि चिन्ता ब्यक्त गर्दै सांसद दवाडीले ती खोलाहरुमा तटबन्ध गरिनुपर्नेमा सरकारको ध्यानाकर्षण गराइन् ।

गोरखकाली रबर उद्योग र भृकुटी कागज उद्योगलाई पुनःसंचालन गर्न र नर्सिङ अधिकृतको दरबन्दी बढाउन पनि उनको माग छ । बिएससी नर्सिङ तथा बीएन पढ्का लागि भन्दै विद्यार्थीहरु विदेशिने क्रम बढेको हुनाले नर्सिङ अधिकृतको दरबन्दी थप गरी उनीहरुलाई स्वदेशमा नै रहने वातावरण बनाउन पनि उनले सरकारको ध्यानाकर्षण गराइन् ।

                                                             रासस